Sa isinagawang online survey sa Facebook, malinaw na mas marami ang naniniwala na ang pangalang "Tayabas" ay nagmula sa salitang "bayabas," isang alamat na matagal nang nakaugat sa kultura ng Tayabas. Ang pagkakatulad ng tunog ng dalawang salita ay nagpapalakas sa paniniwalang ito. Ang kwento ay madalas na nagsasabi na ang mga dayuhan, partikular na ang mga Kastila, ay nagtatanong sa mga Pilipino kung ano ang isang partikular na puno o lugar, at dahil sa limitadong pag-unawa sa wika, ang sagot na "bayabas" ang naunawaan nila. Sa paglipas ng panahon, ang "bayabas" ay naging "Tayabas."
Ngunit, ang mga bagong pag-aaral ng mga mananaliksik
na Tayabasin kabilang na sina G. Jun Redor at iba pa ay nagmumungkahi ng ibang
posibilidad: ang salitang "Tagabas," isang uri ng pako, bilang mas
malamang na pinagmulan. Ayon kay G. Redor noong mga panahong iyon ay nasa
kasaganaan ng pako na tinatawag na tagabas. Ang pag-aaral na ito ay
nagpapakita na ang bayabas ay hindi katutubo sa Pilipinas, at ipinakilala
lamang noong ika-17 siglo sa panahon ng pananakop ng mga Espanyol. Kung gayon, malamang na ang mga dayuhan ay mas
nakakakilala sa punong bayabas at hindi na ito magtatanong kung talaga. Bukod dito, ang iba pang mga haka-haka, tulad
ng "taya-abas" (mula sa isang uri ng sugal) at "tinabas"
(mula sa tinabas na tela), ay kulang sa malinaw na ebidensiya.
Ang
pinaka-malamang na paliwanag ay ang pangalan ng mga lugar sa Pilipinas ay
madalas na nagmula sa mga pangalan ng mga halaman o puno na laganap sa lugar na
iyon. Halimbawa, ang Maynila ay nagmula
sa salitang "nilad," isang uri ng halaman na tumutubo sa mga ilog at
baybayin.
Samakatuwid,
batay sa mga bagong pag-aaral, ang mga mananaliksik na Tayabasin ay naniniwala
na ang "Tagabas," isang uri ng pako na matagal nang tumutubo sa lugar,
ang mas malamang na pinagmulan ng pangalan ng Tayabas. Ang pagiging katutubo ng halaman na ito ay
nagbibigay ng mas matibay na ebidensiya kaysa sa kwento ng bayabas.
No comments:
Post a Comment